NAIBU WA RAIS ALILIPA VIJANA ADAI BENSOUDA

Kiongozi wa mashtaka Bi Fatou Bensouda BEN KIRUI Upande wa mashtaka katika Mahakama ya Kimataifa ya Uhalifu (ICC) umedai kwamba NAIBU wa Rais William Ruto alilipa vijana Sh500 kila mmoja kutekeleza ghasia za baada ya uchaguzi mkuu wa 2007. Madai hayo ni miongoni mwa ufichuzi wa kina zaidi kuhusu mashtaka yanayomkabili naibu wa rais, ambayo yalifichuliwa jana na Kiongozi wa Mashtaka Bi Fatou Bensouda. Kulingana na Bi Bensouda, pesa hizo zilikuwa zinakabidhiwa na wawakilishi wa Bw Ruto, hasa mwandani wake Bw Farouq Kibet, kwa vijana wakati wowote walipohudhuria mikutano ya kuandaa mashambulizi dhidi ya jamii zilizoaminika kuwa wapinzani wa chama cha ODM katika uchaguzi huo. Kwenye nakala iliyotolewa Jumatano hii, jambo jingine lililofichuliwa ni kuwa Gavana wa Bomet Isaac Ruto alihudhuria mojawapo ya mikutano ambapo inadaiwa mipango ya vita iliandaliwa.